2017年8月13日 星期日

食海鮮去旺角咩?

係!無錯,的確係去旺角食海鮮^^"

唔知係咪我個人認知出現左障礙,我覺得食海鮮一定係要去海邊XD
不過其實唔係海邊都有海鮮食既。




★ 招牌六小碟
一坐低前菜就到,有海蜤、魷魚、粉腸、豬肚、豬脷,仲有碟係韮菜花,好似無上到,不過都無人食既,所以無特別追。
個人覺得邊吹水有D野咬下,味道不過不失,無乜特別。


★ 傳統杏汁豬肺
湯品一向係我最愛,呢個湯既味道岩岩好,杏汁唔會太濃,我幾Like。
個人唔太鐘意杏汁個味蓋過個湯既味,會覺得自己唔知係飲緊湯定食緊糖水XD


★ 黑椒波士頓龍蝦
有睇開我Blog既朋友都知我好注重海鮮既來源,盡量都只食可持續海鮮。
根據WWF既《海鮮選擇指引》波士頓龍蝦就係建議可以食用既海鮮。
嗱嗱嗱,淨係呢點都大大加分啦:)
黑椒幾惹味,味道偏重,肉質厚實,但個人是幾喜歡既:)

★ 避風塘炒辣蟹
蟹係我勁愛,又幾經常食既海鮮,暫時係得中國既青蟹要唸清楚先食,其他都無乜問題。
避風塘炒我勁勁勁鐘意,非常香口,而且炒得幾入味,隻蟹好夠份量,咬落啖啖肉架。
我鐘意每啖都加少少炸香左既蒜一齊食,超正:)
不過食多兩舊係會有D太鹹XP

★ 避風塘炒蜆
我心目中既避風塘係好似蟹咁充滿蒜既,不過無所謂啦:)
個蜆既感覺係南乳味,少少辣都幾有風味,美中不足既係D蜆唔太新鮮,有一、兩隻食到有腥味,同埋有少少沙粒。

★ 豉椒蟶子皇煎米粉
蟶子好厚肉,又大條,不過味道偏鹹左少少,搶左D蟶子既鮮味,米粉感覺亦太乾身,可以揀其他煮法應該更食到蟶子既精髓。

★ 油浸沙巴龍躉仔
龍躉係需要避免既海鮮,呢個我PASS。

★ 新鮮波蘿咕嚕肉
友人狂食菠蘿XD我個人覺得肉唔太肥,Like!

★ 旺角小炒王
炒得幾爽口又有獲氣既一味:)

★ 旺角脆皮吊燒雞
炸得好香脆,但雞肉略嫌唔夠嫩滑。

★ 啫啫芥蘭煲
熱辣辣又夠惹味:)

★ 一品炒飯
估你唔到最後有驚喜,D飯粒粒金黃又乾爽,我食左兩大碗。

最後紅豆沙作結,都唔係Hea架,足料!

整體覺得呢間旺角海鮮菜館既價位少貴,味道偏濃,但當中既海鮮有唔少都係跟WWF建議既《海鮮選擇指引》,要搵到呢類餐廳真係好難,淨係呢點都大大加分啦:)

沒有留言:

張貼留言

Related Posts Plugin for WordPress, Blogger...