玩完水，緊係一大班朋友仔去食海鮮啦：）
唔想係海旁D海鮮店同人迫餐死，可以唸下行過少少，行過兩條街食通記。
都係個句Yandy係海邊長大，食海鮮食到大，但自從開始滑浪、潛水之後因為對保育認識更深，而定會盡量跟返WWF可持續海鮮個LIST去食，不過好多餐廳都無標示來源，而通記有樣好就係你可以自己買海鮮俾佢幫你煮，咁就萬無一失啦！
玩完一日熱辣辣，一坐底先黎個★ 龍蝦刺身拼盤，龍蝦肉就唔多，但都幾有咬口兼新鮮，加埋金箔係面，淨係上菜個下都已經夠哂睇頭啦：）
加埋其他刺身，每人都分到唔少架！
★ 螺頭粉葛煲豬展（爵士湯）
生冷野我唔多受得，食完即刻飲返碗湯暖下肚，湯幾夠火喉，又甜又足料，不過鐘意飲湯既話就真係唔多夠喉啦！
★ 芝士焗龍蝦伊面底
一黎到已經非常肚仔餓，黎個芝士伊面打定個底先慢慢食，龍蝦充滿香濃芝士味，咬落啖啖肉，不過識得食一定係食伊面，伊面先係吸收哂日月精華既重頭戲：）
★ 蒜茸粉絲蒸元貝
豉油汁淋上面，粉絲同帶子都鮮味十足，簡單又滿足既一道。
★ 花雕蛋白蒸蟹
蟹一向係我的最愛：）用蛋白蒸帶出陣陣鮮甜味，蟹膏都更上一層樓。
★ 豉油王大蝦
又大又肥美既蝦，豉油味非常，裡裡外外都散發豉油混合蝦既鮮香味，連殼都可以啜一餐。
★ 椒鹽賴尿蝦
大大隻賴尿蝦好易就開到肉出黎，食完豉油食椒鹽，唔一樣既鮮度，但同樣想啜埋個殼XD
★ 清蒸海上鮮
經過好上火既兩道菜，黎個簡簡單單既蒸魚，蒸既時間岩岩好，魚肉唔腥又嫩滑。
★ 黃金鮑魚
壓軸出場既係呢個黃金鮑魚，第一次食咁整既鮑魚，入口好香蛋黃味，慢慢咬鮑魚既鮮味，仲好爽口彈牙，食海解有鮮味之餘仲有層次感。
★ 海鮮炒飯
★ 西貢時菜時炒
最後個飯我已經飽死左食唔落，友人表示非常多海鮮，好足料咁話。
菜呢，清一清飽濟感，炒得香口又唔太油。
★ 芒果布甸
★ 精美果盤
最後甜品有芒果布甸同西瓜，芒果布甸太吸引，唔記得影已經落左肚XD好滑好香芒果味，西瓜清清甜甜。
價錢大概$500位，唔係特別抵，但唔會係遊客價，食材新鮮，煮得亦有水準，去到西貢唔想同人迫，呢間係好選擇，下次睇睇可唔可以自備海鮮就食得更環保：）
沒有留言:
張貼留言