2017年5月9日 星期二

海鮮盛宴‧食之前要唸一唸

又係飯聚,今次非常少有既居然係食中菜,仲係海鮮餐@口@
其實Yandy係海邊長大,食海鮮食到大,但自從開始滑浪、潛水之後因為對保育認識更深已經越黎越少食海鮮,過去呢幾十年因為過度撈捕等既問題,海洋生物少左90%,科學家更預言到2048年個海可能會無哂魚T^T
點樣可以平衡食定唔食,其實我自己不至於完全唔食,但會盡量跟返WWF可持續海鮮個LIST去食,不過好多餐廳都無標示來源,有時真係唔知點點菜,不過又唔可以怪哂餐廳,因為而家海鮮既源頭真係唔清晰,真心希望政府同業界合作,令我地呢D小市民食海鮮都食得安落。


今次黎到呢間海港薈,係海港飲食集團旗下主打婚宴既,所以環境裝修特別靚,紫色調感覺浪漫,地方開揚、寬敞。

我一直都以為海港飲食集團係唔多注重環保既食肆,所以有好幾年都唔會主動去食,今次朋友約到,我亦都唔會特別推卻。
值得一讚既係酒席無魚翅,而家擺酒,無翅餐單係基本,但成個餐單都無翅就真係少有,感覺上係有進步,但我都係會再觀察下先,因為日常MENU都仲係有唔少保育類既食材。




作為化妝師,其實我都去過唔少婚宴場地,進場呢個滿佈花花既位置絕對係靚靚影相位XD
台上仲有三個大螢幕,慳返唔少場地佈置費呀!
最正係新娘房超大呀,唔知黎緊有無新娘子係到擺酒,等我試下係到化下妝:)

廢話唔講太多,準備開餐:)

★ 阿拉斯加長腳蟹
據我所知,阿拉斯加長腳蟹唔係保育類,係少有我食得安心既海鮮,呢隻有四斤左右,上枱個下非常有氣勢。
每雙蟹腳都已經事先剪開左,完全唔洗工具就可以優雅送入口XD
蟹味足,鮮甜肉厚,蟹蓋就...苦苦地咁,不過呢隻蟹向來都係食腳為主既。


★ 羊肚菌海蔘燉螺頭
湯品一向係我的最愛,飲落暖笠笠既感覺真係好暢快。
呢個燉湯好足料,羊肚菌係比較少食到既菇類,爽口得黎收埋唔少湯,消化不良,痰多咳嗽好岩食架。
海參我本身就唔多鐘意佢既口感,而且佢有淨化海岸既作用,都係少食為妙。


★ 法式甘荀汁焗元貝皇
帶子我個人都幾鐘意食,一絲絲既質感好細膩,用甘荀汁焗係第一次見,令帶子更鮮甜,加埋D薯蓉,口感更加豐富。
不過食帶子要睇產地,中國、日本、昆士蘭同西澳既都無問題。


★ 蠔皇原隻花膠扒
以大魚既魚鰾製成既花膠,呢一大舊相信條魚至少有張枱咁大,係就就又厚又有張力,味道亦唔腥,以花膠黎講真係難得食得入口既,但中醫建議每次食花膠亦不宜多過2両,好易致消化不良架。


★ 龍皇披金甲
將龍蝦打成膠再包住龍躉煎香,龍蝦同龍躉都係睇產地,香港既養殖龍躉係無問題既。
不過咁煮就好似有D浪費,估計廚房係想形造豪氣既食法,但出黎既效果令我覺得有少少煎釀三寶既感覺((唔好打面


★ 露筍黑雞樅炒白背木耳
黑雞樅係菌類,第一次見,爽口得黎同平時食既菇類都有少少唔一樣既質感,值得一試 
另外白背木耳同我地見開既黑木耳,口感同味道都好似差唔多,不過變左白色感覺好似乾淨好多XDDD
一黑一白加埋脆綠既露筍,視覺非常吸睛,淡淡蒜香清解一下之前既啖啖肉。


★ 薑芽叉燒酥x生磨杏仁茶燉蛋白
最後黎一道甜品作結,薑芽叉燒酥做得好鬆脆,咬得出一層一層既酥皮感,叉燒亦恰到好處。
但生磨杏仁茶燉蛋白...我本身已經唔太好杏仁,但佢太足料,杏仁苦到澀,加埋蛋白既甜有中和到,但我都係食唔哂>.<"

成餐飯以食物計,都真係有D唸頭,中式黎計睇得出每一道菜式非常精緻亦有心思,亦用左唔少特別既食材,好似羊肚菌、黑雞樅、白背木,帶到新鮮感之餘味道大部分都係水準之上,每道菜既排位亦非常好,由氣勢開場,味道慢慢提升,再清一清油膩感,飽足完成。
但衷心希望餐廳更加注意食材既選擇,令我地既下一代都有機會品嘗到現在既美味。

沒有留言:

張貼留言

Related Posts Plugin for WordPress, Blogger...