2015年4月21日 星期二

灑家‧貴乎功夫做到足


望落咪又係普普通通一碗雲吞麵...
以為無料到,點知一試先知不得了!!!
鹼水麵無鹼水味,口感強韌彈牙得黎唔會黏、唔會咬極唔斷。

通常麵檔做法係用大煲滾水煮熟,勤力既過埋凍水再鹼水味,不過麵身口感一定冇咁爽。
灑家既做法係攤個麵出黎放幾日,等佢散哂陣鹼水味先再煮。
時間用多左,但個麵就贏哂啦!
加埋雲吞細細粒,一啖一粒,蝦味香口,平凡中看得出細心之處。




再黎少少前菜,白灼雙併,揀左豬潤同魷魚,不過呢個重點係個豉油到,點咩都好食呀。


滑牛鮮魚片粥,粥同魚都係我唔食既野,完全無掂過,但友人大讚個粥煲得好綿身。
鯪魚球我食左粒架,其實炸得幾香口、外層煙韌得黎有少少脆口、內層軟得黎夠彈口,之但係我真係唔鐘意魚味XD


炸醬麵係採用左正宗京都做法,所以偏辣少少,唔會太甜,更加無酸味,濃味香口。
炸醬唔會太傑,同麵好易撈埋,唔會痴到一舊舊,最緊要係唔會油淋淋。

同樣,乾炒牛河終於有間唔係油淋淋架啦,牛肉亦唔係揾粉拿鬆哂個種,有咬口得黎唔會太多根。
老闆話佢地既河粉係請人一條條分開左先少,條條都沾到醬油兼夠鑊氣,食落真係唔會痴到一PAT PAT,爽口又入味,呢D咪做足功夫囉!


雲吞雞湯濃郁唔會太油,女仔真係堅唔鐘意油淋淋既,原諒我提左咁多次XD
雞唔鞋口,雲吞清清地,整體都好好味。
豬手呢,偏濃味左少少,但一啖湯、一口豬手岩岩好,配下飯應該都唔錯。
豬手少少黏口既膠質,咬落好有嚼勁,Like!


唔係好夠喉再叫左D小食,叉燒包我最愛:)
呢到就係流汁叉燒包,特登要包到流汁先好味喎...雖然唔太理解,但又真係好味過平時個D喎!
叉燒瘦多肥少岩哂我呢D麻煩港女,個汁夠Juicy又唔會流到四圍係,包唔太厚又唔太乾,我可以一個人食兩籠!
蝦腸粉!!!我講個電話已經落哂人地個肚啦T^T睇黎應該係太好味?!
新野!!!皮蛋炸蝦筒,其實我食個時唔知係乜,只知道好鬆脆,好香口,大大隻蝦包住左,但皮蛋又真係唔多覺喎^^"不過值得一試架!
最後馬拉糕其實又好難整得難食既,聞落香噴噴,食落鬆軟少少甜:)


最後飲左杯有營青瓜豆漿,呢個又夾得幾好啊!
消一消濟又夠Fresh!

第一次食呢間印象很好,食物唔算好抵食,但樣樣都幾有水準,功夫做到足,連河粉都特登請個人黎鬆開先炒,個人工入返落碟炒河都算有價值!

Related Posts Plugin for WordPress, Blogger...