興起食雞煲好似係呢兩年既事，大大話話都食左十幾次，呢間又幾特別，芝士雞煲，聽到都覺得吸引。
老老實實，地點對我黎講都幾遠，而且地址話地鐵站行7分鐘就到，而事實上足足行左三、四個字，Well~就當我是路痴的錯好了。
我地Book錯左三位，但唔知做咩最後變左五位^^"
由於唔想等成個鐘，所以都照坐下來四人枱，但呢到既位置都真係幾迫下，侍應出出入入都踢到我張凳，成餐飯都食得好辛苦，所以真係預多好過預少。
終於上菜啦! 聞都聞到芝士香啊!
賣相又幾OK喎，但遇著我地成枱人都唔食蔥同芫茜，於是夾手夾腳夾走哂XD
走完睇落有D 地，但味道濃郁，芝士味好重，少少Creamy感，雞都幾嫩口。
單食雞我就覺得偏鹹左少少，大家都好快停左手，多幾個人分應該會更好。
之後放湯打邊邊啦＞V＜
真心有少少失望，唔知係個火唔夠勁定點，個湯好似永世都滾唔起咁。
而芝士味太搶，食咩都係芝士味......
手切牛頸脊其實幾靚仔，幾有咬口，但變左芝士味，食唔到牛味。
唔知係扇貝定帆立貝，廿幾蚊一隻睇落似冰鮮，其實都貴貴地，但夠大隻，賣相就夠哂吸引。
可惜唔新鮮，咁濃既芝士味都蓋唔過腥味，但我承認我對腥味係超級敏感既，畢竟係海邊長大，由細開始就食新鮮海鮮，所以有少少腥我都唔OK＾＾”
餃我食左韭菜豬肉餃，不過不失啦，味道夠搶，中和下芝士味。
魚我就無食既，唔太好，但友人食就站幾唔錯。
竹笙墨魚滑，聽落睇落都好特別，但食過之後都係想話不如俾竹笙我食就算啦...
竹笙其實無咩問題，但墨魚滑滾完變硬左，仲要有少少腥味，感覺好唔夾。
菇無咩特別，但原來同芝士都幾夾的。
蜂巢冰豆腐，唔多地方有得食，好食既，但個人覺得有少少膩，始終太芝士啦!
墨魚滑呢到叫魚歡喜，整到成條魚咁係幾得意既，但虛有其表，同竹笙墨魚滑入面既墨魚滑一樣有少少腥味。
成餐最覺得一定要食既就係留到最後既呢兩塊芝士同出前一丁，堅係俾出前一丁架!
同芝士夾到無朋友，仲吸收埋打邊邊既精華，好味到呢＞V＜
整體感覺係噱頭多於一切，除非你本身好鐘意芝士，如果唔係，成煲都係芝士，再好食都硬係覺得有D飽飽濟濟咁＠.＠
食物質素亦只屬一般，試一次都OK啦，但試完一次一定唔會返轉頭。
沒有留言:
張貼留言