2016年6月22日 星期三

停不了的打邊邊@鍋居火鍋專門店

炎炎夏日都阻擋唔到我打邊邊既興緻,今次為左試下個玄米茶湯底,特登走到去深水埗。
聽聞呢間鍋居火鍋專門店係飲食界既老行尊攪既,食物好有水準架。

果然一黎到就有驚喜,未打邊邊先食花生,唔係普遍花生,係麻辣花生,惹味加分:)
食住個黑椒蜜汁雞翼等個鍋滾,甜甜地又辣辣地,非常開胃。


重點既玄米茶湯底,真係放左個茶包黎滾架喎,仲有少少蘿蔔、冬瓜同昆布,滾起後要拎返走個茶包,唔係就會越煲越苦架啦。

打邊邊Must Have Item一定係肥牛啦,全人手切既頂級手切本地肥牛,賣相一流,本地貨都咁靚仔,口感就唔錯啦,再多D牛味就完美了。

一邊食緊肥牛,另一邊黎個象拔蚌刺身爽口鮮味,鐘意既仲可以滾兩秒先食,口味更煙韌。

呢個珊瑚蚌都好新鮮,咬口一流:)

現炸既響鈴,望落有少少油,但一浸落湯到就去哂油啦,呢個玄米茶湯底都幾得喎:)
炸魚皮無油益味,又香脆,食唔停XD

丸係手打既,墨魚丸同鮮蝦丸,真係有墨魚同鮮蝦肉係粒丸到啦,彈牙又新鮮。
魚腐外脆內軟,咬落好有質感。


菜類非常豐富,不過我係食肉獸,係咁而食少少啦,感覺都幾新鮮,同埋夠乾淨。

玄米茶湯底既好處係清D,打邊爐都無咁熱氣,最岩又想打邊邊,又怕熱氣既女士門。
不過我呢D人比較重口味,都係鐘意濃味野。
整體食物非常新鮮有質素,但反而令我記憶最深刻既係個前菜既黑椒蜜汁雞翼,大力建議做埋小菜XD

沒有留言:

張貼留言

Related Posts Plugin for WordPress, Blogger...