2015年5月21日 星期四

包羅萬有‧杏花火鍋

愛打邊邊的人是一年四季都可以打邊邊的XD
杏花樓就成日食,今次黎到觀塘新開既「杏花火鍋」打邊邊。


等齊人之前較岩個個醬料先:)
要有既醬基本上都齊啦!




等個爐滾既時候就食住日式刺身拼盆先啦:)
不過我唔太受到生冷野,只係食左蛋同蟹柳,蛋好Juicy,好香蛋味,蟹柳雖然無咩特別,但食落都唔係D劣質貨。
野飲就幾特別啦,羅漢果無花果茶同紫貝天葵,羅漢果個味我唔太喜歡,紫貝天葵幾香又清清地,幾岩打邊邊。


邊邊個湯底係胡椒豬肚雞鍋,先飲湯再打邊邊,個豬肚包住隻雞黎煲,剪開豬肚,完全冇臭味,入面隻雞仲Keep住嫩口,個湯好香胡椒味,少少辣又唔會太Over,不過飲完再加上湯打邊邊,上湯就有少少唔夠味啦,下次要留多少少胡椒湯做湯底先得。


我地嗌到成枱都係,都咪話唔瘋狂XD
不過我唔食魚,白鱔片同鯇片就唔關我事,但友人大讚新鮮又嫩口。
鮮豬潤我都唔記得左試XD
比較特別既係即炸魚腐大皇(左下),食落唔似魚,外面香脆,入面嫩滑,香口既小食。
響鈴、魚皮都係即炸既,咬落D魚皮好似食緊薯片咁,正!
響鈴夠哂香口,衰在個湯唔係太夠味,唔係就完美了:)

但講到尾,打邊邊既重頭戲都係肥牛:)
本地手切肥牛,手切都咁薄身,脂肪紋幼身得黎分佈平均,食落好嫩,牛味亦好夠。
正!正!正!


講到牛,一定要試下呢到特有既牛之天地雜錦拼盆。
西式拼盤咁放滿哂唔同部位既牛,安格斯肥牛、牛柳粒、牛展、牛胸爽、牛坑腩、黑柏葉都齊哂,滿足食牛既慾望XD
安格斯肥牛比本地肥牛更嫩身,但牛味無咁重,牛胸爽我第一次食,口感幾特別,好似食緊爽口彈牙既肥膏,但又幾挺身。


杏花四式滑
我本身唔太鐘意食D乜滑物滑既,但呢4款滑個味又幾OK,有咬口得黎好似食緊魚蛋既感覺。
農場時蔬拼盆
見到都覺得新鮮既蔬菜,最開心係有埋菇類。


手打稻庭烏冬同勁爽蝦子麵,招牌手打三寶丸
烏冬係打邊邊既好朋友,我食左超多XD
蝦子麵本身我唔太好,但呢隻都幾香口彈牙。
再配埋招牌手打三寶丸,我呢粒是牛啊,又滑又嫩,仲好香牛肉味,Nice:)


最後以薑茶西米皮湯圓作結,第一次食西米皮整既湯圓,口感好特別,感覺無咁膩,同時保有湯丸既質感,入面既芝麻似係手磨的,香口得黎仲有少少野咬。
薑茶我是不嬲都唔飲既,但呢碗試左兩啖又幾易入口,甜味同薑味50/50,唔太辣又唔太甜XD

整體以打邊邊黎計係水準之上,食物新鮮得黎都有少少新意,餐前仲有個刺身真係幾貼心。
但敗筆之處係我地個湯底留得唔夠,搞到打邊邊時得返D上湯味,冇哂D靚湯底T^T
下次再黎我會留返半煲湯做底XD
Related Posts Plugin for WordPress, Blogger...