2015年1月23日 星期五

用燉湯烚下烚下‧問你試過未@尚鮮無煙火鍋海鮮料理

友人都知Yandy不嬲最愛打邊邊,呢日成班朋友話約無煙打邊邊,緊係要睇下係咩新野啦。

間野係佐敦都算幾中心點,雖然係一樓又唔算太難搵既。




坐底第一件事緊係混一混個醬先啦,醬介費係另外俾的,選擇都咖少,我淨係落左少少辣椒同熟蒜,熟蒜好香啊,所以我落得太重手,吸哂D豉油。大家記得落輕手D啦。


等緊朋友仔既同時,先黎個泰式生蝦醒醒胃,不過向來不太愛生的我沒試,但在場幾個友人極速把它消滅乾淨,大讚好食呢!沒機會俾我滾熟黎試XD


食下熟食蒜香炒牛粒同燒芝心獅子狗卷慢慢等齊人。
牛粒好香口,好滑好好惹味,但油脂偏勁,我唔敢食太多呀XDDD
芝心獅子狗一直我都有買黎自己煎或者打邊邊,中間芝心超正,串住黎燒就更有風味,正!


終於黎到戲肉,打邊邊。
個爐既邊位有吸氣孔,打邊邊既煙一升上黎就吸走哂,打完邊邊個身都唔會一陣味。
再踩落下場都冇問題XDD

個湯底就更加有驚喜,係燉足4個鐘既蟲草花花膠燉雞腳,足料燉湯才不過$168,抵!
睇下D花膠幾吸引,個燉湯清而不膩,香味濃郁,蟲草花最吸引我地,好好咬口啊。

飲完個湯先加上湯上邊邊,正!!!


肥牛絕對係打邊邊必備的,「牛尚盛」一碟有哂牛粒、肥牛同牛脷,睇到都吸引>V<
D肥牛仲雪花均勻,食落有咬口又夠牛味。
牛粒我就麻麻地,入口溶哂D肥脂出黎,絕對係女人大敵啦。
牛脷無特別感想,無腥臭味就可以了。


再黎個大大隻象拔邦都係$688,刺身、打邊邊兩食。
刺身夠鮮夠爽口。
待應教我地邊D要灼幾耐,十十下就更有咬口。
淨係個排場都贏哂啦:)


其他邊爐配料亦好有心思,呢個四色丸尚盛同蟹皇餃真係不得了!!!
四色丸尚盛款款都係有包心的,包既餡料仲粒粒唔同。
我呢粒就係魚丸包紫心蕃薯,幾有新意喎。
另外呢個蟹皇餃,成個餡是係蟹粉做,冇加到肉架,真材實料。


墨魚滑釀冬菇,仲有黑魚子係面,呢個組合又出乎意料地夾,好味:)
百花釀油條係好幾間都有食過,未算新奇,但炸得岩岩好,唔太油又唔太硬。
浸一浸湯又得,就咁食都得,個人就鐘意浸一浸湯,淋淋地帶少少煙韌感。
響鈴係新鮮自家炸的,比較有空氣感,食落唔會變左一大舊野。
午餐肉排就排到好得意,好易夾,不過烚完要夾返上黎就難少少啦,切返大條少少會更好。


菜類點都要食D,望落幾新鮮翠綠,仲可以MIX埋唔同菜類,個個都有得揀,唔洗焗食一、兩款,NICE!

整體超水準,最鐘意打完邊邊個身無成陣味,湯底燉足4個鐘,真係清甜好味,飲過番尋味。
邊爐配料樣樣都夠哂特式,個象拔蚌刺身連烚烚下又新鮮,埋單不過$250左右一位,超滿意!
Related Posts Plugin for WordPress, Blogger...