2018年5月30日 星期三

眾裡尋它千百度‧點尋先岩?@COVERMARK

黎到夏季,對於底妝既需要變得更嚴苛,大大話話都試過唔少底妝產品,而今次真係覺得驚喜度滿分。

COVERMARK貴為「星級粉底專家」,創立品牌既意念係源於幫助有需要自然遮蓋面上胎記、疤痕、白蝕等有關皮膚色素問題人士。
經過多年後,依然深受唔同用家喜愛,對於品質及豐富既粉底色調都有獨到既一套。




面對琳琅滿目既底妝產品,其實好多女士都會無從入手。
產品既系列、功效、成分、質感。
適合咩膚質、做到點樣既妝效、持久度、保濕度都有分別。
要揀岩自己既粉底其實都係一大學問。


COVERMARK就有一套套有既「Jusme color」理論,去幫你揀岩用既粉底色調。
透過藍調、黃調做試色條,搵返真正正確適合你膚色既色調。

BA會係你手上畫上藍調、黃調做試色條,經過一段時間,試色條中間呈現比較自然既膚色,就係真正正確適合你膚色既色調。
以我為例,上方黃調既試色條中間既肌膚望落白裡透紅,而下方既藍調試色條就灰灰黃黃,所以我會比較適合用黃調。


COVERMARK既底妝產品,都有專用既底霜同蜜粉可以配為一套使用。
遮瑕度不足,亦可以配上遮瑕膏一齊打造完美膚質架。
粉底本身亦有唔同既質地,BA唔會而家邊樣新出就推邊款,反而係因應你既膚質同需要,耐心咁解釋返每款產品既特點,令你揀岩產品既機率大大提升,呢點非常之咁令人安心。


經過一輪精挑細選,我最後揀左呢兩件產品小試牛刀。
♥ 亮肌持久底霜 SPF30 PA+++
♥ 草本漢方修護粉底霜 SPF 18 PA++


♥ 亮肌持久底霜 SPF30 PA+++
亮肌持久底霜有分黃調同藍調,我當然係跟據測試揀返黃調啦。
不含香料成份,防曬效能SPF30 PA+++大部份OL都好夠,但對於有白蝕既我黎講,就要係上妝前另外再搽多少少防曬啦。

佢既凝亮粉末的柔焦效果,有效撫平肌膚細紋及瑕疵,同時可以提升肌膚透澈明亮感。
加入抗油光粉末吸收過度分泌既皮脂,再利用吸收左既皮脂形成鎖水保護膜,避免產生油光。
蘊含珍貴草本漢方成分(補濕成分),包括葡萄籽油及當歸精華,有效滋潤及舒緩肌膚深層,保持妝容貼服。


認真,質感確實有D吮身,有少少難推勻,不過我後來轉用化妝掃拖開,感覺就易控制好多啦。
效果方面就好驚喜,係面上推開後,有明顯既去黃效果,但自然到好似天生既素肌一樣,修飾到膚色不均,令膚質更細緻。


♥ 草本漢方修護粉底霜 SPF 18 PA++
持久滋潤乳液狀粉底,有效抑止油份產生,傾向水潤既奶油肌妝感。
草本植物精華能改善粗糙肌膚,算係萬用型既粉底。
同樣不含香料成份,輕度既防曬效果,一般日常都好夠用。

我揀既色號係YN 10,自然色,對我黎講係偏深左少少,但我主要想就返我條頸係比面深色。
個人都係建議用海綿/ 化妝掃上妝,因為手指真係要花少少心機先推得均勻。
遮瑕度唔算太高,大約處理到5-6成既遮疵,但對我黎講都幾夠用。
不過最近就唔好彩,生左粒大大既石頭瘡,淨係靠粉底就未必夠遮,要另外再加遮瑕。

非常鐘意個粉底同肌膚既貼合度,上完妝都會有仿如無一物既感覺,妝感非常自然舒適。
瑕疵近睇都會見到少少既,但整體感覺自然又唔失真。


最令我驚嘆既係佢既持久度,岩岩化完妝係自然貼服既妝感。
但經過12個鐘,完全無補過妝既狀態,混合性偏乾肌既我,只面頰係乾左少少,有輕微浮粉既狀況,但未去到出油既狀態。
鼻有輕微既出油,比起我平時返完8個鐘,個額同鼻少左5-6成既油份。
連下巴粒大暗瘡都無脫妝問題,成個妝既完整度係有6-7成架,我真心要拍手讚好。

我以前都會覺得底妝既選擇就係要好好摸索自己、了解自己,唔同時間亦會有唔同既偏好。而今次既體驗可以係短時間內快速咁了解自己,簡單搵到同自己配合度咁高既底妝產品,真係好神奇。

滿足到個人需求既底妝產品,就好似你第二層肌膚咁完美包裹住你,人地會話「你皮膚好好喎」
而唔係問「咦?你今日係咪化左妝?」
我唸呢個就係我想要既效果啦:)

「產品及有關資料由品牌提供」
Related Posts Plugin for WordPress, Blogger...